नागाव येथे शनिवार पासून राज्यस्तरीय कबड्डी स्पर्धा

शिरोली : नागाव ता. हातकणंगले येथील सिद्धार्थ क्रीडा, शैक्षणिक व सांस्कृतिक मंडळातर्फे ४५ किलो वजनी गटातील राज्यस्तरीय कबड्डी स्पर्धांचे आयोजन करण्यात आले आहे. या स्पर्धा मुलांच्या व महिला गटात होत आहेत. शनिवारी (दि. २५) व रविवारी ( दि. २६) मे रोजी नागाव येथील डॉ. बाबासाहेब आंबेडकर नगरमधील सिद्धार्थ मैदानावर या स्पर्धा होत आहेत. अशी माहिती सिद्धार्थ क्रीडा, शैक्षणिक व सांस्कृतिक मंडळाचे संस्थापक अध्यक्ष सुनील सूर्यवंशी यांनी पत्रकार
परिषदेत दिली.
ते म्हणाले शिरोली एमआयडीसीतील व्हर्साटाईल ग्रुपच्या संचालिका बिनाताई जानवाडकर, नँट फौड्रीच्या संचालिका आशा जैन यांच्या हस्ते आणि ज्येष्ठ उद्योजक सुरेंद्र जैन यांच्या अध्यक्षतेखाली स्पर्धेचे उद्घाटन करण्यात येणार आहे. शनिवार दि. २५ मे रोजी सायंकाळी ५ वाजता स्पर्धेचे उद्घाटन होत आहे,
कोल्हापूर जिल्हा कबड्डी असोसिएशनच्या मान्यतेने स्पर्धा होत आहे. या स्पर्धेत प्रथम येणाऱ्या संघास १५ हजार रुपये रोख व चषक द्वितीय क्रमांक येणाऱ्या संघास १० हजार रुपये रोख व चषक आणि तृतीय येणाऱ्या संघास ७ हजार रुपये रोख व चषक, असे बक्षीस देण्यात येणार आहे. या व्यतिरिक्त आदर्श संघ, उत्कृष्ट चढाई, उत्कृष्ट खेळाडू, उत्कृष्ट पकड अशी विविध बक्षिसे देण्यात येणार आहेत.
स्पर्धेत सहभागी होऊ इच्छिणाऱ्या संघांनी सिद्धार्थ क्रीडा, शैक्षणिक व सांस्कृतिक मंडळाचे लखन कांबळे, स्वप्निल राजाध्यक्ष व जीवन कांबळे यांच्याशी संपर्क साधून आपल्या संघाची नोंदणी करावयाची आहे, असे आवाहन करण्यात आले आहे.