‘गोकुळ’ची संस्था, उत्पादकांना गणेशोत्सवी भेट : दूध दरात वाढ, अनुदान

कोल्हापूर : कोल्हापूर जिल्हा सहकारी दूध उत्पादक संघ (गोकुळ) तर्फे गणेशोत्सवाच्या पार्श्वभूमीवर दूध उत्पादक, प्राथमिक दूध संस्था आणि संस्था कर्मचाऱ्यांसाठी महत्त्वाचे निर्णय जाहीर करण्यात आले. दूध खरेदी दर प्रतिलिटर १ रुपयांनी वाढ, दूध संस्थांसाठीच्या इमारत अनुदानात आणि प्रोत्साहन रक्कमेत वाढ करण्यात आली असल्याचे संघाचे चेअरमन नविद मुश्रीफ यांनी पत्रकार परिषदेत सांगितले.
याबाबत अधिक माहिती देताना चेअरमन नविद मुश्रीफ म्हणाले की १ सप्टेंबर २०२५ पासूननवे निर्णय लागू करण्यात आले असून यामध्ये म्हैस आणि गाय दूध खरेदी दर प्रतिलिटर १ रुपयांनी वाढविण्यात आला आहे. या दरवाढीमुळे गोकुळच्या उत्पादकांना दरमहा साडेचार ते पाच कोटी रुपयांचा जादा लाभ मिळणार आहे. प्राथमिक दूध संस्थांसाठी मिळणाऱ्या इमारत अनुदानात ८ ते १० हजार रुपयांची वाढ करण्यात आली आहे. दूध संस्था कर्मचाऱ्यांच्या पगारासाठी मिळणाऱ्या प्रोत्साहन दरात प्रतिलिटर ५ पैशांची वाढ करण्यात आली आहे. यामुळे वार्षिक ३ कोटींचा भार गोकुळवर पडणार आहे.
मुक्त गोठा योजना सुधारणा करण्यात आली आहे. यामध्ये आधी ५ जनावरांची अट असलेल्या योजनेत आता ४ जनावरे असलेल्या लहान उत्पादकांनाही लाभहोणार आहे. सध्या गोकुळमार्फत ७,५०० प्राथमिक दूध संस्थांद्वारे दररोज १६ लाख लिटर दूध संकलन केले जाते. “दूध उत्पादकांचे श्रम, संस्था सचिव व कर्मचारी यांचा सहभाग हा गोकुळचा पाया आहे. त्यांना योग्य मोबदला देणे आणि दुग्ध व्यवसाय बळकट करणे हेच आमचे ध्येय आहे,” असे नविद मुश्रीफ यांनी स्पष्ट केले.