गांधीनगरातील तीन व्यापाऱ्यांकडून १० हजार किलो प्लास्टिक जप्त : २० हजार रुपये दंड वसूल

    कोल्हापूर : महापालिकेच्या आरोग्य विभागाच्यावतीने महापालिकेच्या हद्दीतील गांधीनगर येथे प्लास्टिकची तपासणी केली असता सचिन ट्रेडर्स, सद्गुरु ट्रेडर्स, अवतार ट्रेडर्स या व्यापाऱ्यांकडे सिंगल युज प्लॅस्टीकचा साठा आढळून आला. त्यामुळे या तीन व्यापा-यांना महपालिकेच्या आरोग्य पथकाच्यावतीने सचिन ट्रेडर्स व सद्गुरु ट्रेडर्स यांना प्रत्येकी ५ हजार रुपये प्रमाणे १० हजार रुपये व अवतार ट्रेडर्स यांना रुपये १० हजार दंड करुन तो वसूल करण्यात आला. तसेच या तिन्ही व्यापाऱ्यांकडून १० हजार किलो प्लॅस्टिकही जप्त करण्यात आले. आतापर्यंतची ही सर्वात मोठी कारवाई असून साधारणता एक आयवा डंपर भरेल एवढे प्लास्टिक जप्त करण्यात आले आहे.
शासनाच्या निर्देशाप्रमाणे शहरात एकल वापर प्लास्टिक बंदी मोहिमेची महापालिकेच्यावतीने प्रभावी अंमलबजावणी करण्यात येत आहे. यासाठी आरोग्य निरिक्षक व कर्मचारी यांच्या पथकांमार्फत दैनंदिन शहरात विविध भागात तपासणी मोहिम व कारवाई करण्यात येत आहे. या तपासणी मोहिमेदरम्यान ही कारवाई करण्यात आली आहे. सदरची कारवाई प्रशासक के.मंजूलक्ष्मी व अतिरिक्त आयुक्त राहुल रोकडे यांच्या मार्गदर्शनाखाली सहाय्यक आयुक्त-2 कृष्णा पाटील, आरोग्य निरीक्षक माधवी मसुरकर,नंदकुमार पाटील, करण लाटवडे, सुशांत कवडे , सुशांत कांबळे व मुकादम आणि आरोग्य कर्मचाऱ्यांनी केली.
महानगरपालिकेच्या हद्दीमधील सर्व आस्थापना व संस्था यांनी एकल वापर (सिंगल युज) प्लॅस्टिकचा वापर बंद करावा. जर शहरामध्ये एकल वापर (सिंगल युज) प्लॅस्टिकचा वापर करताना कोणीही आढळल्यास त्या आस्थापना, संस्था व नागरीकांवर आरोग्य विभागामार्फत दंडात्मक कांरवाई करण्यात येणार आहे. तरी सर्वांनी सिंगल युज प्लॅस्टीकचा वापर टाळावा व कापडी पिशवीचा वापर करावा असे आवाहन महापालिकेच्यावतीने करण्यात आले आहे.