‘झापुक झुपूक’ सिनेमाचा ट्रेलर रितेश देशमुखच्या हस्ते रिलीज

मुंबई : जिओ स्टुडिओज् आणि केदार शिंदे ही सुपरहीट जोडी २५ एप्रिल २०२५ रोजी ‘झापुक झुपूक’ हा कौटुंबीक मनोरंजन करणारा सिनेमा घेऊन पुन्हा एकदा प्रेक्षकांना भेटण्यास येत आहेत. नुकतच या सिनेमाचा धमाल ट्रेलर रितेश देशमुख ने रिलीज केला आहे. बिग बॉस सीजन ५ च्या यशानंतर रितेश सूरजच्या या खास क्षणी सामील झाला आहे. दिग्दर्शक केदार शिंदे ह्यांनी बिग बॉस च्या वेळीच सूरज सोबत एक चित्रपट बनवण्याचं ठरवलं होतं.
सूरज चव्हाण अभिनित ‘झापुक झुपूक’ रोमांस, ऍक्शन , ड्रामा या सर्व गोष्टींवर प्रकाशझोत टाकणारा हा चित्रपट आहे. सूरज चव्हाणची स्टाईल आणि धमकेदार डायलॉग्स अख्ख्या महाराष्ट्रात आता गाजणार आहे. ट्रेलर मध्ये दोन कमाल गाण्यांची झलक सुद्धा पहायला मिळते. त्यातील एक गाणं नक्कीच ह्या पुढे हळद गाजवणार. त्याचसोबत सुरज आणि जुई भागवत ची छान जोडी अजून आकर्षक करते. फॅमिली एंटरटेनमेंटचा जबरदस्त तडका असलेल्या “झापुक झुपूक” चित्रपटाची टीम संपूर्ण महाराष्ट्राचं मनोरंजन करायला सज्ज आहे.
रितेश देशमुख ह्यांनी ‘झापुक झुपूक’ च्या प्रवासाबद्दल म्हणाले “बिग बॉसची जेव्हा सुरुवात झाली तेव्हा माझा आणि सूरज साठी तो पहिला प्रवास होता. केदार भाऊंसाठी सुद्धा तो पहिला प्रवास होता. सूरज जेव्हा बॉग बॉसच्या घरात तिसऱ्या आठवड्यात होता तेव्हाच केदार भाऊंनी सूरजवर सिनेमा बनवण्याचं ठरवलं होतं. त्यांनी त्यावेळी मला म्हंटलं होतं कि विजेता कोण पण असू दे मी सूरजवर चित्रपट बनवणार आणि ह्या गोष्टीचा मी साक्षीदार आहे. असं नाही आहे कि सूरज जिंकल्यावर सिनेमा बनवण्यात आलाय. त्यामुळे केदार भाऊंच्या हिम्मत आणि कंमिटमेंटला माझा सलाम आहे. ह्या सिनेमाचं संगीत, एडिटिंग, स्टोरी सगळंच अप्रतिम आहे.
यावेळी दिग्दर्शक केदार शिंदे म्हणाले “‘झापुक झुपूक’ ची कल्पना जेव्हा मला आली सूरज चव्हाण ला घेऊन त्यावेळेस बिग बॉस मराठी सुरु होतं. मी कलर्स मराठीचा प्रोग्रामिंग हेड असल्या कारणामुळे बिग बॉसची जबाबदारी माझ्यावर होती. त्यावेळी माझं आणि रितेशचं खूप बोलणं सुरु असायचं तेव्हाच मी ती कल्पना रितेश ला सांगितली. रितेश भाऊंना ही कल्पना भयंकर आवडली आणि त्यांनी सुद्धा मला सांगितलं कि जर माझ्याकडे उत्तम गोष्ट आहे तर मी ती पुढे आणावी.
‘झापुक झुपूक’ चित्रपटात सूरज सोबत जुई भागवत, इंद्रनील कामत, हेमंत फरांदे,पायल जाधव,दीपाली पानसरे, तसेच पुष्कराज चिरपुटकर, मिलिंद गवळी हे मुख्य भूमिकेत झळकणार आहेत. प्रत्येकाला आपलीशी वाटणारी ही गोष्ट आहे. एका लव्हस्टोरी सोबतच वेग वेगळ्या भावनांचा मिश्रण या सिनेमात पहायला मिळणार आहे.