व्ही. शांताराम यांचे नातू राहूल शांताराम यांचा अशोक सराफ, वंदना गुप्ते सोबत नवा चित्रपट

मुंबई:चित्रपती व्ही. शांताराम, ज्यांनी मराठी सोबतच संपूर्ण भारतीय सिनेसृष्टीत मोलाचे योगदान दिले, त्यांचे नातू आणि किरण व्ही. शांताराम यांचे चिरंजीव राहुल शांताराम ‘राजकमल एंटरटेनमेंट’ या पूर्णतः नवीन प्रॉडक्शन हाऊसच्यामार्फत एक नवा मराठी चित्रपट घेऊन येत आहेत.हा नवा चित्रपट १० एप्रिल २०२५ रोजी आपल्या भेटीला येणार आहे.
राहुल शांताराम यांनी चित्रपटाचे शीर्षक अजून गुलदस्त्यात ठेवले असले, तरी या चित्रपटात अनेक वर्षांनी आपल्याला दिग्गज अभिनेते महाराष्ट्र भूषण अशोक सराफ आणि वंदना गुप्ते यांची जोडी रुपेरी पडद्यावर एकत्र दिसणार आहे. थोडी खट्याळ, थोडी गोंडस आणि थोडी हळवी अशी ही अनोखी गोष्ट असलेल्या या चित्रपटाचे दिग्दर्शन लोकेश गुप्ते हे करत आहेत.
या चित्रपटाबद्दल अभिनेते अशोक सराफ म्हणाले “बऱ्याच काळानंतर मला इतकी सशक्त भूमिका साकारण्यासाठी मिळालीय, जिची मी वाट बघत होतो. चित्रपटाची गोष्ट सध्याच्या काळाशी सुसंगत आहे. वंदना गुप्ते या हरहुन्नरी अभिनेत्रीसोबत मी यापूर्वीही काम केलंय. ती व्यक्ती आणि अभिनेत्री या दोन्ही स्वरूपात कमालीची उत्कट आणि हजरजबाबी आहे. तिचं आणि माझं गिव्ह-अँड-टेकचं टायमिंग छान आहे, त्यामुळे या दोन्ही पात्रांना उठावदारपणा आलाय. आम्ही दोघांनीही नेहमीसारखं प्रामाणिकपणे, जीव ओतून आपापलं पात्र साकारलंय.
चित्रपटाविषयी राहुल शांताराम ह्यांनी सांगितलं, “राजकमल एंटरटेनमेंट नेहमीच विविध भाषांमध्ये सिनेमा आणि डिजीटल माध्यमात उत्तम आणि दर्जेदार मनोरंजन देण्याच्या प्रयत्नांत आहे. मातीतल्या, स्थानिक गोष्टी जगभरात पोहोचवण्याचा आमचा कयास आहे. आमचे मोठे पप्पा अर्थात् चित्रपती व्ही. शांताराम यांच्याप्रमाणेच सिनेमामधल्या कलावंत आणि तंत्रज्ञांच्या टॅलेंटला हक्काचा प्लॅटफॉर्म देण्याच्या हेतूनं आम्ही काम करतो. अशोक मामा आणि वंदनाताई या दोघांसोबत काही इतर अनुभवी कलाकार आणि अत्यंत नवीन आणि फ्रेश टॅलेंटसुद्धा आपल्याला बघायला मिळतील.”
वंदना गुप्ते म्हणाल्या ‘राजकमल एंटरटेनमेंट’ या चित्रपटात अशोक सराफसारखे एक उत्तम अभिनेते आहेत. अशोक सराफ हा अत्यंत कसलेला अभिनेता आहे. कॅमेऱ्याचा प्रत्येक अँगल, दिग्दर्शकाने लावलेली फ्रेमनुसार आपल्या अभिनयाची शैली बदलत राहणं आणि मुख्य म्हणजे, आपल्या सोबतच्या प्रत्येक कलाकाराला पूर्णपणे कम्फर्टेबल करणं, यांत त्याचा हातखंडा आहे.
दिग्दर्शक लोकेश गुप्ते म्हणाले, “या चित्रपटाच्या निमित्ताने अशोक सराफ आणि वंदना गुप्ते या मराठीतील दोन दिग्गज कलाकारांसोबत काम करण्याची संधी मिळाली. अशोक सराफ सरांसोबत काम करण्याची माझी इच्छा पूर्ण झाली. निर्माते राहुल शांताराम यांच्या प्रयत्नामुळे हा चित्रपट जुळून आला. हा अनुभव आयुष्यभर माझ्या स्मरणात राहील.”