मुख्यमंत्री एकनाथ शिंदेच निश्चित करणार कोल्हापूरचा उमेदवार

कोल्हापूर : लोकसभा निवडणुकीची घोषणा केव्हाही होण्याची शक्यता असून याबाबत महायुतीचे उमेदवार निश्चित करण्याची प्रक्रिया दिल्लीपासून सुरू आहे. कोल्हापूर लोकसभा मतदारसंघासाठी उमेदवाराची प्रचंड उत्सुकता निर्माण झाली आहे. पण आता कोल्हापूर लोकसभा मतदारसंघासाठी मुख्यमंत्री एकनाथ शिंदे यांनाच उमेदवार निश्चित करण्याचे अधिकार दिले असल्याचे सूत्रांकडून समजते. लवकरच मुख्यमंत्री एकनाथ शिंदे कोल्हापूर लोकसभा मतदारसंघासाठी उमेदवाराचे नाव महायुतीच्या राष्ट्रीय नेत्यांकडे पाठवणार आहेत.
हा उमेदवार मुख्यमंत्री एकनाथ शिंदे यांच्या अगदी निकटवर्तीय तरीही प्रशासकीय अनुभव असलेला पण राजकीय पार्श्वभूमी नसलेला आहे अशी चर्चा आहे.
भाजपचे नेते अमित शहा यांनी लोकसभा निवडणुकीसाठी उमेदवार निश्चित करताना निवडून येण्याची क्षमता हाच निकष निश्चित केला आहे. तरीदेखील कोल्हापूर लोकसभा मतदारसंघासाठी सध्या अनेक नावे चर्चेत आहेत. कोल्हापूर लोकसभा मतदारसंघात गेल्या वेळी शिवसेनेच्या वतीने विद्यमान खासदार संजय मंडलिक हे प्रचंड मताने निवडून आले होते. त्यामुळे ही जागा शिवसेनेलाच द्यावी लागणार आहे. महाविकास आघाडी कडून कोल्हापूरचे श्रीमंत शाहू छत्रपती यांचे नाव जवळ निश्चित झाले आहे. फक्त अधिकृत घोषणा झालेली नाही. त्यांच्या विरोधात महायुतीला उमेदवार देताना खऱ्या अर्थाने कस लागला आहे. त्या अनुषंगाने आता महायुतीकडून उमेदवार निश्चितीबाबत हालचाली सुरू आहेत. या सर्व हालचाली अंतिम टप्प्यात आहेत. तसेच भाजप, राष्ट्रवादीसह एकनाथ शिंदे यांच्या शिवसेनेला ही जागा निवडून आणण्यासाठी कसोशीने प्रयत्न करावे लागणार आहेत.

आता या जागेवर एकनाथ शिंदे यांनीच उमेदवार निश्चित करावा याबाबत वरिष्ठ पातळीवर निर्णय झाला आहे. त्यामुळे लवकरच एकनाथ शिंदे यांचा निकटवर्तीय उमेदवार निश्चित होणार आहे. आणि त्या उमेदवारास निवडून आणण्यासाठी महायुतीतील सर्व घटक पक्षातील नेते आणि कार्यकर्ते यांना एकत्रित प्रयत्न करून ही जागा कोणत्याही परिस्थितीत जिंकून घ्यावी लागणार आहे.